聽日入到Server先算啦！你又點揀？香港航空$0機票搶票攻略(4)！

唔洗我哋講都知，聽日(17/10)上晝10點開始就係港航$0來回機票搶飛日，講真票價包埋20KG行李係抵玩嘅！明日航點包括：曼谷、首爾、名古屋、沖繩、大阪、東京成田、福岡、札幌、峇里島，一聽到其實都應該知道，唔塞爆Server已經算贏。

今次我哋會講吓，如果萬一預上個Server炒粉嘅情況下，大家有咩方法可以自保呢？

講之前都講少少大家想知嘅嘢：旅行日期為即日至2024年3月24日(首爾、名古屋、沖繩、大阪、東京成田、福岡、札幌：2023年12月20日至12月27日、2024年2月7日至2月14日不適用；曼谷、峇里島：2023年12月22日至12月25日、2024年2月7日至2月14日不適用)

聽日先後次序？個個航點你鍾意就買啦！

快運會唔會截擊？斷估都唔會！佢個$38單程馬尼拉未完！

你問呢啲問題，都唔驚個Server炒粉？

好啦，如果大家試過港航炒Server，有機會發生double booking嘅情況：就係系統寫付款失敗；但過幾個鐘後出咗票，仲要出兩次。

呢個時候千祈唔好急唔好亂，一定要Cap Screen。因為呢個係你可以同佢傾refund嘅最重要嘅證據。

過幾個鐘之後，就會收到booking confirmation，當你發現double booking嘅情況(明明話付款失敗但又收咗錢出咗兩個唔同編號booking)嘅時候，記得呢個email：

refund@hkairlines.com

將你嘅姓名、機票號碼同退款原因(Double booking due to system error)，連埋機票booking嘅cap圖同System Error嘅Cap圖send畀佢哋。

你要等大概一個月左右(係，足月)，佢哋會有一日打過嚟，同你確認個人資料，同埋咩原因要退款。再過半日，就會通知你退款成功。

再等多一個月，佢哋個會計部就會通知你退款成功！