里數有如渣男！國泰航空里數兌換變天？最慘情係邊個？跟Packngo.hk買嘅朋友成最終贏家？

睇我哋長時間嘅朋友，都知我哋對里數一律都係建議快換唔好儲咁多。我哋2023年年頭已經講過(有link)，里數就好似細細個去歡樂天地冒險樂園玩推銀機換飛仔咁，一副Hello Kitty啤牌要用幾多張飛換，全部都係由航空公司呢個庄決定同打骰。里數就係一個渣男，玩吓好喇，學正隔籬台咁叫人瞓身，依家咪做咗又蠢又蟹嘅蠢女人。

不過人哋唔通死老竇，我哋咁衰仔恥笑咩？唔會囉！但如果跟我哋Packngo.hk推介入貨嘅朋友，又的確係做咗最終贏家！

詳細增減就唔多講喇！其實就係一啖砂糖九啖屎，經濟艙除咗超短途不變同類別2加咗之外，大部分都係減咗嘅。不過PEY、J同F會部都加晒。

Cut咗咁多，各位菠蘿會朋友就一定有損失，其實呢個變化，對咩菠蘿會員影響最大呢？

1.跟渣打銀行做定期嘅朋友
渣打銀行一直都做緊個plan，放1百萬到銀行做0.01厘定期，送最高38萬里數嘅即時被人打耙，依家啲銀行做緊4-5厘息，即時蝕息又蝕里數，慘。

2.香港出發死忠菠蘿會友
香港出發已經貴，仲要直航機賺里數又少，又加咗兌換價，你話又邊樣嘢好？

3.為坐商務艙簽卡儲咗一大堆亞萬嘅朋友
好多呢啲朋友都唔係真係國泰嘅fans，但只係為咗儲里數去旅行。不過依家商務艙大加價，換日航卡達加到癲咗，如意算盤打唔響，真係喊出嚟。

但點解話跟我哋Packngo.hk推介入貨嘅朋友做咗最終贏家？

如果你一路都睇開，都知我哋一直以每金額除積分，以成本低去推介跑分盤的。即係每次都係最平成本嘅跑分盤，自然影響較低。

例如之前推薦國泰ICN/BKK嘅商務艙跑分，用六千蚊港幣，買入1套首爾來回商務艙、1套曼谷來回商務艙、再加14000里，差1000里就可以換到香港台北來回機票(如果你用國泰卡，去官網買已經賺多1000里以上)，即係2張Business+1張Econ，平均連稅只係二千蚊左右。

而你又諗吓，多咗位redeem，即係架機爆咗機會大啲？咁會upgrade啲金鑽銀卡客先，定係冇花嘅綠卡轆卡賺里數客先？跑分跑嘅唔止係里數，仲有status喎。

其實國泰唔係蠢嘅，越忠誠嘅客戶，利益係冇乜大變。有錢嗰班一早買咗J，度縮鑽卡客買PEY駁升J呢啲已經出晒名，咪又係升佢哋先。

如果以呢個方向去睇，你就明白，叫你跑分，我哋係冇昆你咖。

不過又講一句公平說話，國泰早兩個多月通知，比好多航空公司已經好有良心(阿提哈德只有八個鐘打去CS，真心嬲咗)。