馬來西亞醫療旅遊之旅！廣東話醫生主診！港幣二千幾蚊私家醫院照腸鏡體驗！

小編去馬來西亞做咩？

事緣今年七月馬來西亞醫療保健旅遊理事會來港舉辦論壇，小編好幸運抽獎抽中，趁住中秋體驗呢個「馬來西亞醫療旅遊之旅」。

今次小編唔驗血唔照超聲波呢啲簡單嘢，走嚟吉隆坡照腸鏡！先旨聲明，呢一部分係我哋自費要求，無收廣告費，有單有據！

大家都知香港私家醫院照腸鏡就算日間做都差不多萬五蚊，過夜冇二萬走唔甩！如果touchwood有瘜肉，香港又逐粒收錢。就算有醫保又要自己先畀錢，預先批核免找數嗰啲又要指定網絡醫生，如果係孤兒單自己claim錢真係煩到癲。

馬來西亞私家醫院香港旅客自費，Package都只係港紙二千七到三千五左右！足足係香港五分之一價錢咋！

大家關心嘅問題係馬來西亞醫療質素得唔得？其實講咩都冇用，你上去港大同中大醫學院睇吓研究生同教授嘅資料，都有唔少係馬來西亞人嚟，咁信唔信得過自己諗啦！

馬來西亞私家醫院真係好大好先進，病房係獨立病房，預約時知小編係香港嚟，會安排識廣東話嘅醫生處理，溝通完全冇障礙！

小編都有問過腸瘜肉呢個問題，醫生話瘜肉細過5mm就免費割除，大過先要收錢，乜咁好嘅咩？上晝八點半入院，過程靜脈麻醉冇感覺，下晝兩點拎埋報告走得。

不過你特登過嚟做腸鏡，我哋又唔建議，但如果嚟開吉隆坡玩，擺底兩千幾三千蚊港紙做腸鏡，小編又覺得幾抵，身體係自己嘅，健康最重要！