航空短打 – 真金白銀搭快運慘過做職業Fan屎！網民大爆：超賣要喊先送餐券！
香港快運超賣已經唔係今日嘅事，賠償賠得特別cheap都唔係咩新鮮嘢，不過今次有網民投訴搭香港快運被超賣，要喊先有張餐券送俾你，搭個飛機去旅行啫，都要考演技？咁我唔去考演藝學院？
話說有網民喺threads入面發表自己乘搭香港快運被超買經歷：原定搭早機UO870飛成田嘅佢因超賣被安排至下午機UO646，快運賠償咗$400港幣。先唔論四百蚊多定少，難得去一次日本，book好曬嘅店因為超賣而去唔到，正常人都會有啲心傷。
事主即場喺check in櫃檯喊咗出嚟，地勤人員可能見到佢咁慘，相當暖心咁俾多張餐券佢，仲話「淨係得佢有」。
任何親切關心乘客嘅行為我哋旅遊狂徒都會作出高度讚揚。不過要搞到喊先送多張餐券未免真係小家咗啲，咁呢啲都係地勤公司跟航空公司做法，鬧HAS都冇用。
快運嘅賠償令我哋諗起當年職業fans收費：送花1000、大喊500、追車300、尖叫200…真係估唔到，今時今日搭個飛機都要靠演技喇！
