航空短打 – 搞唔死國泰！但搞死快運！港航直斷快運糧倉！

雖則話香港奉行自由經濟，價格係由市場決定，競爭好似真係無可避免。但正如明褔俠話齋：「左手又係肉， 手掌又係肉。」今次個故事係來自海南航空兩個親生仔：香港航空同香港快運。有內部知情人士爆料，話港航自從染指日韓線後，全部連稅來回千四樓下包行李飛機餐，刀刀入血，劍劍到肉，原來一系列行動唔係狙擊國泰，而係針對快運！乜話？兄弟鬨牆咁好玩？

知情人士話，港航同國泰價錢一向唔會減好多：「如果有留意港航價錢大概會知，港航一直以都係國泰七折已經好夠客。」知情人士續說：「難得國泰賣得貴，港航又有得拉高個毛利執返多少少，所以(價錢)唔會落到咁盡。」留意港航與國泰平起平坐的札榥、峇里、馬爾代夫等航線價目，就算劈足全場台北線，都與知情人士所言相近：「國泰日本有日航同美航頂住堆轉機客，日本線客量問題不大，你見佢減都唔減就知。」

咁點解話係針對快運呢？知情人士說：「客就得兩批，一班係睇價錢做人，另一班係睇坐開邊間。其實日韓線已經畀快運搶走晒睇價錢嘅客，所以今次減價對國泰影響唔算多。反而港航減價，快運首爾、東京同大阪booking數跌晒。」面對競爭，消息指快運已經暫緩日韓線擴張計劃：「東京(票價)賣到六百蚊(未稅)，計落條數仲平過快運，點打？」一直以來，日韓都係快運最賺錢黃金航線，有時行李可以多到要Offload就知道賺得幾和味。點解同一個阿媽生，港航都要招招重擊，劍劍封喉？知情人士不願多談，只係講左句「雙方管理層一直都有少少牙齒印」就草草結束。