推廣費真係會成為航空公司cut班關鍵？同你揭穿冇人搭都照飛嘅「推廣費」真相！

近日香港快運航空疑因推廣費問題，宣佈取消熊本航線。推廣費其實係咩嚟？點解航空公司會因為推廣費cut班？推廣費又有幾多？今次我哋請到曾經負責香港某間航空公司，並曾處理推廣費同航線管理嘅大佬，同大家講解一下「推廣費」真相！

問：「推廣費」究竟係咩嚟？

答：推廣費係當地政府或旅遊局為咗旅遊推廣或製造政績，就會向航空公司提供現金資助同補貼開辦同營運航線，吸引兩地旅客來往。航空公司除咗載客、載貨，仲有收資助同補貼嚟賺錢嘛！

問：係唔係即係有「推廣費」航空公司就開航線？

答：其他公司唔知，我哋以前嗰間就當然內地網絡比競爭對手大，開「推廣費」航線當然好賺，而且內地開港澳台都係國際航線，喺政績欄上係一個好重要指標！所以你見當年都開咗啲奇奇怪怪又冇乜客嘅線，都係啲阿總傾返嚟我哋跟啫！

問：係咪個個航點都有「推廣費」？

答：當然唔係啦！東京會唔會有推廣費？佢唔加價都偷笑啦！

問：「推廣費」係咪好多？

答：話多唔多啦，要睇究竟係地方政府支助、當地旅遊局支助，前者會多啲，後者就少啲。航空公司收取當地政府推廣費係每星期過百萬計，好似曾經有香港去內地某城市咁…每星期都有一百二十萬嘅資助，一個月都有接近五百萬。

問：「推廣費」係唔係永續？有冇啲咩要求？

答：推廣費每次都有合約要簽，入面都寫明支助期限、每個星期要開幾多班機、達到呢啲要求會得到幾多錢、幾時結算等等…
完咗咪再傾吓會唔會Renew囉，有啲唔Renew嘅就算有客都直接cut，好似以前某東南亞航點咁，班班機都爆旅遊局一cut咪一樣停飛；但有啲大陸航點冇乜客，都可以捱好耐，都係推廣費啫！

問：你點睇香港快運因為「推廣費」取消熊本線？

答：航空公司所有航點營運都係賺錢為上，都好正常！不過國泰班人一向都唔志在呢啲錢，Covid前後都冇變～

多謝晒大佬同我哋解釋「推廣費」同取消航班嘅決定性，希望大家都了解更多「推廣費」嘅操作啦！