航空短打:真係咁驚咩?東南亞竟然冇人去?大爆大陸航司淡季狂劈價清貨原因!
近期油價不斷上升,但深圳同廣州去東南亞來回機票嘅價錢跌完又跌,永無止境!以曼谷為例,由九百幾跌到落八百幾都有交易,而且全服務航空公司都由二千樓上劈到落千四蚊包行李,實行唔理咁多,為求清貨!反而珠三角地區日本線,有啲仲貴過香港,唔通輻射水已經殺到上深圳,個個high到神神化化,口水流到上眼?
但反觀香港飛東南亞就加完又加!由低位九百幾上返一千二左右,睇怕觸及咗支持位!
不過點解會咁呢?有內地航空公司業界向我哋爆料,原來八月嘅時候講述大陸人被賣豬仔去東南亞做電騙嘅電影《孤注一擲》喺內地爆紅,令到好多人聽到東南亞三隻字都怕怕,令到訂位數大跌。
有部分航空公司見勢色唔對,都取消咗航班,好似春秋航空咁,直接取消深圳曼谷線,冇眼屎乾淨盲。
珠三角地區飛柬埔寨嘅航班相對唔多,減價幅度唔大,但曼谷真係飛得都唔少,所以面對有位冇人坐,航空公司唯有劈價清貨,早走早著。