上次經驗！預估今次點玩！香港航空$0機票搶票攻略(2)！
唔洗我哋講都知，聽日(7/8)上晝10點開始就係港航$0來回機票搶飛日，講真票價包埋20KG行李係抵玩嘅！聽日7個目的地派9800張機票，而其中四個係中國航點，一個日本、一個泰國、一個韓國，除返開每個航點1400張(話你知肯定唔會咁分)，除咗已經知嘅旅遊日期係2023/9/1至2024/3/24同埋旺季唔會有之外，你又冇諗過點部署先？
今次航點包括邊度？
三亞、北京大興、杭州、南京、曼谷、名古屋、首爾
今次七個航點嘅航班現時售價、分佈同客量，我哋估計今次供應量分佈：
曼谷(大量)
三亞(大量)
杭州(大量)
名古屋(中量)
首爾(中量)
北京大興(中量至少量)
南京(中量至少量)
明日放飛航點部署？
小編即場心水，我哋會分開入場先後次序，如果你係中午12時前入到場揀樓，建議排序係：
名古屋 > 首爾 > 曼谷(凌晨機除外) > 北京 > 南京 > 杭州 > 三亞
如果之後揀樓嘅：
北京 > 杭州 > 三亞
各航點有咩注意嘅地方？
曼谷：凌晨機一直都好平，唔好揀
南京：午去晚返，時間靚過杭州
杭州：晚去早返，如果玩三日要book五日期，玩四日book六日，其實個成本都高，預計晚上入系統都有貨
三亞：伏
剩返大陸航點，say唔say no？
以價論價：
除非你想去如果去上海，建議飛南京，而經杭州去上海時間有啲差，所以應該供應大量。
北京平日都貴，免費都抵嘅其實。
三亞就唔喇，出晒名坑遊客，我哋好得閒咩。
如果聽日快運突然減價，轉唔轉軚？
睇航點！睇價錢！我哋都估聽日或後日快運截擊向隅客機會都大！估計韓國/曼谷都大機會！邊面執到先執啦！
