Suki妹機場手記 – 二奶「紫ee」冇箍搞到爆煲？大婆「陸」師奶得閒又搞事！

Suki好耐冇出嚟喇，近排話復常，咁咪閒約吓sis去大嶼山吸吓啲新鮮空氣試吓新酒店啲high tea囉～

當然大家話題一定離唔開陪嫁女「紫ee」，話說當年「鞋蘭」家道中落，咪將呢隻生到金蛋嘅雞賣畀「太公」，初時都覺得佢都算搵到住好人家投靠吓啦，點知呀大婆「陸」師奶覺得「紫ee」北姑味重，話幫佢要改頭換面，先襯得起成個「太公」家族喎。

講真，比起「紫ee」以前個好姊妹「紅紫荊」，其實「紫ee」點講都幾順眼吖，又唔覺得北姑味重呀。「Suki呀，你又唔係冇同『陸』師奶做過嘢，佢哋成家一向都係冇事搵事做架啦！唔搞嘢邊度呃到『太公』磅水啫！」

係嘅係嘅，但係縫條檯布落條裙度high fashion嘢，Suki真係唔識欣賞喇。

講返轉頭，一直靠日本食糊嘅二奶「紫ee」近排畀人傳話冇箍搞到爆煲，咳晒啲日本班。有熟「紫ee」嘅sis就話，間間都唔多夠箍，邊度得「紫ee」一個唔夠先得：「依家間間都唔可以再入紙加班，人哋有數量限制，畀『台灣妹』開廣島都唔畀你呀！咁可以點做？」

又係呀，「太公」家族上下已經搶到最多位，其實賺到笑啦講真。苦生同制洲倒一月尾開航大計又咳晒，點計二月都冇理由唔夠到要咳嘅！

*上述內容不代表本台立場*