航空短打 – 鬥快收皮！同你回顧吓各大航空公司勁快摺線系列！

比利時航空閃電宣佈停辦香港來回布魯塞爾(南)航線，咁又老老實實開航咗唔夠半年經已摺埋，都係四隻字：客量唔得！不過回顧咁多年，其實都唔止得佢咁做乜勁架！所以今日我哋特備節目「各大航空公司勁快摺線」系列，同大家回顧一下各大航空公司摺線紀錄啦！

比利時航空 – 香港來回布魯塞爾(南)

呢條線係比利時航空首條航線，亦都係首條長途線嚟，2018年5月1日開航，而對手仲要係同時間開航嘅國泰航空。不過各大行家一致唔睇好，長途機冇connection partner真係同自殺冇咩分別，2018年9月27日停航。而客量試過係1J+14Y(1個商務艙乘客+14位經濟艙乘客)，十五個人包一架A340，真係對人好嘅啫。

香港航空 – 香港來回倫敦格域

當年香港航空楊總買咗3架33V(原本訂5架)，聲稱打造全港第一條「全頭等及商務航線」，2012年3月7日正式首航，有180度平躺嘅CLUB PREMIER頭等(即係依家33V商務艙座椅)同CLUB CLASSIC商務(類似依家332嘅商務艙座椅)，仲有個空中酒吧。當年巴之閉話要超越國泰，結果客量平均4F+6J(4個頭等+6個商務)，有時仲要冇客到Cancel，呢樣的確係超越到國泰嘅！結果因為港航大亂，楊總被踢走後，2012年9月3日停航，33V拎返海南改造到依家咁嘅地獄經濟艙，真係多謝晒啊！2018年頭，港航曾經指今年內會開辦倫敦航線，但年中因海航主席事件後，內部已放消息指擱置開辦目標。

甘泉香港航空 – 香港來回溫哥華

作為香港甚至全球第一間長途低成本航空公司，甘泉香港航空於2007年6月28日正式開辦香港來回溫哥華航線，開航時標榜$2000來回(未連稅)，連寄艙行李及飛機餐，以當時及現在的價位來講係極度抵玩，客量長期爆滿。但奈何當時油價不斷攀升至歷史高位100美元一桶，2008年4月9日資不抵債即時停運，平飛加拿大已成絕響。