達人攻略 – 廉航要慳行李費？達人教你奇招慳幾百！

近幾年廉航興起，好多時出現去日本平過去澳門嘅情況！但係呢，大家都知，行李費先係最貴呀！今集我地嘅旅遊達人會教你，點用奇招奇技神item慳幾百蚊行李費！唔睇真係走寶！

識得睇規定先識玩
首先，你要知道，每間公司寄艙行李嘅規定。好似快運咁，係計重量而非件數，即係無論你寄幾多件行李，只要重量唔爆就得。但樂桃呢？唔好意思，逐件逐件計架！

快運係計重量而非件數。

樂桃講明逐件計。

咁樣講，如果你幾個人搭快運，去程反正行李都唔重，咪可以一個人買晒最低重量20KG幾個人分，咁咪唔駛個個買，又慳咗幾百啦！

去程必備！20吋可上機行李箱！

一個人飛咁點算？所以一個可以拎上機嘅行李箱係好重要！因為去程可以放晒啲野入去而唔駛畀幾百蚊行李費嘛！邊度買最平？上淘寶都係一百蚊人仔一個，抵啊！

必買 item – IKEA帆布袋

去程7KG相信大家冇問題，但回程日本返黎，大家都肯定買行李架喇，但你個20吋行李箱唔夠喎，點算先？頭先咪講咗行李唔係計件數嘅？你可以去IKEA買個拉鍊大帆布袋放野入去寄艙架！每個$49蚊，冇收IKEA廣告費，你想要幾多個？

狙擊樂桃而生 – 可摺合拉鍊式28吋行李箱

樂桃你太天真了，你以為限我一個就可以迫我來回程都買行李？人黎出絕招：可摺合拉鍊式28吋行李箱！佢可以收入20吋行李箱入面，一拉拉鍊即變28吋！邊度買？偉大的淘寶一個唔駛一百蚊。以下係小編親身示範：

以上呢三個神item，小編試過Tiger、快運、Airasia、樂桃、日本Skymark同香草完全用到，次次都慳幾百，又有budget去多幾次，都咪話唔爽啊！