航空短打 – 親生都唔放過？鬨牆內幕揭秘！

上回提要：「雙方管理層一直都有少少牙齒印」，有咩牙齒印？咁就要講到…

「呢個要講到當年廚叉黑暗年代喇，話說當年港航同快運楊總年代管理真係好唔掂，貪快食錯左人地堆撻訂貨PW引擎332，又無啦啦買隻冇人搭又載唔到貨既VIP倫敦機，日日燒錢，成日拖街數，拖到國泰HAECO都唔做佢生意。」當年港航眾叛親離，除左大蝕錢之外，油錢又拖、維修費又拖、廣告費又拖，民航處日日睇到實：「結果海航踢左楊總落黎，換孫總接任。」

黑暗年代對廚叉傷害力驚人，到依家好多客一聽到廚叉都搖晒頭。同一時間，賭王見到自己有份嘅快運畀海航搞都蝕當然不滿，因此海航管理層決定將港航同快運分家。前者由海航人管理，後者就向樂桃挖角Andrew Cowen搞低成本航空。2013年，新快運成立，香港人對機票價格低成咁當然狗衝黎唔切：「快運一開，客量升得好快，只係一年時間，快運2014年開始已經賺緊錢。」

「海航落黎開會，見到畀鬼佬(Andrew Cowen)搞一年就有錢賺，畀內部嘅人搞(港航)搞足幾年先開始賺錢，自然畀人媽叉到上天花板。」呢個世界好簡單又好複雜，做得好唔一定受人欣賞，有時會招人妒忌：「當時海航諗住將港航上市，所以就要求兩間公司要簽署不競爭協定，咁快運條數升得快又搵到錢，海航梗係畀佢開晒堆靚port先。」當時快運一口氣開了大阪、成田、首爾、褔岡等多個國泰糧倉，然後不斷加班，盡取黃金航線大賺一筆：「港航就全部都係堆團客Port岡山、鹿兒島，同埋一早插旗嘅札榥、沖繩，係因為台北高雄有航權，先冇畀快運吞埋。」

「老實講，鬼佬又太取進，一個靚port都冇留畀港航，因為覺得IPO(新股上市)一定掂，個不競爭協定會keep住落去，冇諗過內地股災搞到上唔到市。」到股災之後，快運內部開過幾次會，覺得既然不競爭協定解除，港航一定搶攻快運航線，所以不如先發制人：「佢見鹿兒島線爆客，所以加入戰團搶客。佢地(快運管理層)都認為港航始終想同快運有區別，所以價錢上減唔到太盡。」

2016年3月，不競爭協定解除不久，快運立即宣佈開辦鹿兒島、沖繩(石垣島)和高松線，此舉完全觸動港航神經：「申請航線需要時間，咁搞法睇到快運背後一早有心搶客啦。鹿兒島同沖繩港航玩開，完全將不和擺晒上檯。」港航甫即於同年4月中陸續宣佈開辦成田、大阪、首爾航線搶客，期間大阪和成田線不停調動機種，似乎並非有備而來，但針對快運此言實在非虛：「大家見到，港航每次減價都係星期一朝早，你覺得係打冇人買嘅國泰Fanfares，定星期二嘅快運特價？要打Fanfares，駛唔駛落價落到同快運差唔多？一睇就知呢個完全唔係打國泰嘅格局。」

兄弟鬨牆，結局究竟會係點？讓我們一起看下去。