航空短打 – 花紅點玩法?港航今年賺變蝕!

航空界永遠就係最難玩嘅,因為賺賺吓有機會變蝕!好似上年成績都唔錯嘅香港航空,今年唔知派幾多花紅呢?我哋問過一堆內部線人,個個都話未公佈喎!唉,等我哋又要請內部大佬食飯飲茶吹水爆吓料:今年花紅,唔好望太高啦!

內部大佬同我哋講,名義上,海航聲稱賣斷香港航空,等大家「財政獨立」,但實情係海航自身難保,都唔好諗佢地幫到咩手喇!今年港航條數,講真真係唔多掂,雖然短途線加咗價仲有賺,但長途線條數其實唔多好,所以下半年管理層已經努力減FA鐘錢節流,兼且又要畀錢起新總部,所以仍然賺埋唔夠蝕。咁唔cut啲長途機?「世侄,領導說了算呀!海航班老細話要開,你可以唔開咩?」

咁今年份花紅點先?佢都唉聲歎氣咁話,唔好望太高啦…

You may also like...