航空短打 – 海航圍堵政策失敗 旅遊一姐劉美詩回巢救康泰

世上無永遠嘅朋友，亦都冇永遠嘅敵人。自2011年海航集團收購康泰旅行社之後，康泰全線推出「國泰禁制令」，所有團客唔搭國泰轉搭港航，因為咁樣，康泰就捱咗五年低處未算低嘅業績。上個月開始康泰突然飛起港航，團客重投國泰懷抱，引起行內議論紛紛。日前人稱「旅遊一姐」，前康泰旅遊總經理、前專業旅運發展部總經理劉美詩突然宣佈回巢康泰，哦！回巢救恩公呀！

旅行團冇得做

「旅遊一姐」劉美詩自從2010年離開康泰後加盟專業旅運，令專業旅運業績勁升。「Susanna(劉之洋名)好識睇市場，當時知道自由行市場會係未來方向，幫專業旅運做大咗規模。」知情人士透露：「反觀同時，康泰當年仲做平價團客，乜都要平就得，冇食到自由行個勢。」

海航收購 推「國泰禁制令」 搞死康泰

2011年，海航集團以七億港幣收購康泰旅行社五成股權之後，康泰全線推出「國泰禁制令」，如非必要，所有旅行團唔搭國泰，轉搭港航或其他公司。「管理層覺得圍堵政策有效提升港航上座率同盈利，而且又可以打擊國泰，但冇諗過啲客唔受落。」不過，知情人士說，現時旅行團兩極化，一堆是高消費客戶，一堆是低端客：「高消費嘅，佢地畀得起錢升商務艙，服務上國泰商務產品都仍然係好，而港航呢個市場除咗平之外就冇咩賣點。反而平價團，新華美麗華搭港航快運做得又平過你，搞到定位出晒事。」

市場難做 珠三角短線團不放過

同時期，國泰加強與主打做高消費的星晨、縱橫遊和東瀛遊合作，大搶盈利極佳的高消費團客市場。「康泰坐晒響度啦，根本捱打。人地平團搭港航快運，貴團搭國泰，但康泰平貴都搭港航，啲客咋晒型。」自2011年後，康泰鮮有向傳媒披露盈利表現：「好簡單，你見康泰連珠三角短線明星仔之夜都賣，呢啲利潤好低，係以前啲細旅行社仔先見到咋嘛，就知做得幾慘啦。」

一姐回朝 重修舊好

面對每況愈下嘅業績，海航同康泰最後都要面對現實改變策略。上月開始，大部分旅行團都加入國泰航空的選擇，尤其是東南亞市場雖然有港航和快運競爭，但康泰偏向推出國泰/港龍團，標榜可儲里數，行內不少人均認為是劉美詩的決定：「Susanna(劉之洋名)咁叻，應該心知畀得起錢嘅客真係會搭國泰，況且佢同國泰關係一直唔錯，應該拎到好價錢。」

劉美詩回巢救康泰，雖然大家都未知得唔得。但一睇佢都應該行咗適當嘅一步，旅遊一姐當然有料啦！