福岡山陽關西玩住上 – 山陽(廣島、岡山、倉敷)篇

去唔到熊本點算好? 轉戰廣島岡山再直上大阪一樣掂
(毒L專用路線圖) 之[三]
HI，又又係我呀！話咁快黎到廣島，唔講咁多，講重點。

旅程：福岡>小倉>廣島(各下在此)>岡山倉敷(&此)>大阪
時間：８日

廣島有咩玩：宮島，和平公園＋原爆紀念館，三段峽，大久野島（兔島）
倉敷：美觀地區+Outlet（不過小編經常叫左佢就美敷地區）

不過時間既關係，小編剩係去左宮島．．．兔島因為交通班次比較疏，要預一日時間去先得。三段峽都係。小編最後會做多個總結等大家容易啲follow同plan行程嫁啦。

話咁快就去左宮島，話明係島又冇橋，所以要搭船去。不過之前講過有JR PASS既朋友可以用張PASS唔駛錢搭船。

途中會經過一大埋養蠔埸，呢到風和日麗，唔怪得啲蠔咁靚。但係有冇幅射就唔知LU。

上左岸第一時間會見到好多鹿想黎你到搶野食，無錯！就好似城門水塘啲媽騮咁樣，搶膠袋嫁！　同埋呢到唔同奈良，無鹿餅賣，所以你都冇野餵到佢地。而且最近都有報導話唔好摸啲幼鹿啦。所以大家識做啦，唔好見到咁ＱＱ就起勢摸佢地啦。

宮島咁出名因為佢呢個嚴島神舍個鳥居係海出面，而潮退個陣你又行到落去，好似相咁樣。係靚既。

去到你就會見到好多5 yen，啲人求福掉錢(總編按：五円日文發音有結緣之意思，即作與神結緣。)，再經潮退浸下浸下就痴左落條柱到。

不過現埸都有好多工作人員係到執番啲錢，聞就好似因為太多錢再經潮退沖擊撞晒落啲柱到，可能會對結構做成危險。你知啦古蹟黎嫁麻，世界遺產黎嫁喎。唔似我地啲古蹟咁，日本人當然會好小心咁保護啦。

係海到望番嚴島神社，有啲似大澳啲屋咁，一條條木插係啲沙上面去墊高個神社。

而且嚴島神社係比人係到結婚既，配埋傳統日式婚禮服。勁有fu der！！同埋佢地完左儀式要繞埸一周，著左呢套野應該ok熱。

神社附近仲有個五重塔，不過唔入得去既。

呢到附近既商店既一個水池，但係啲錦鯉真係成條大水喉錦鯉大條。唔知食咩大。

都係個句啦，黎到廣島唔可以唔食蠔，不過相比下，琴日個炸蠔好食啲。

廣島另一名物，廣島燒！同大阪燒最明顯分別就在於佢有麵底，你見店入面啲人都係一人一個咁當飯食！不過小編都係鍾意食飯多啲。

倉敷要係岡山轉車，小編都建議去左倉敷先之後夜晚番岡山行outlet，不過outlet閂8點，所以都唔好太夜。倉敷主要係有個叫美觀地區既古城同埋山上有個阿智神社，咁圖中所見就係阿智神社個門口。

其實行上黎都係10分鐘到，唔算辛苦。門口有兩隻寫輪眼。

另一個主打係呢棵阿智之滕係當年三代目火影種落既。

美觀地區係日本重要傳統的建造物群保存地區之一，所以呢度保留左好多傳統既建造物。認真，影相一流

呢度係倉敷愛美廣場，由明治22（即1889）年起既紡織工廠改建而成。最特別係呢度牆身種滿長春滕，真係好green嫁。

另一張圖睇下呢度既牆，不過呢到入面其實係酒店＋商店＋餐廳。

倉敷川，坐唔坐個隻艇就你喜歡啦，不過係河既兩邊行真係好舒服，仲有好多人黎影婚紗相添。

白柴呀＞／／／／／／／／／／＜

小豆島拉麵，賣相同味道都５星呀！！一定要食，唔好唔食。跟手比埋官網你，咁就搵到邊到有得食啦。
網址：www.hishiosoba.com

行程最後先黎到outlet，地點好方便，就係倉敷站隔離，賣既野都同其他地方既outlet差唔多。

下一集，小編帶大家坐ＥＶＡ火車同埋去日本食好西～最後當然比埋啲地圖呀總結呀大家啦～ＢＹＥ～

PacknGo.hk提提你：

想立即出發？香港航空來回大阪新航線來回連稅都係$2535起咋！立即訂飛啦！