[會籍操作]想要港航20KG寄艙行李？又想要國泰Lounge？我全部都要！超前部署Status Match！(1)

開關都差不多半年，飛過嘅都感同身受：港航變咗冇寄艙行李乜都冇得個包嘅廉航！

坊間有人教大家用法國大餐式多舊魚玩法：拎張國泰金卡去澳洲維珍做status match，然後可以享受一件寄艙行李待遇，聲稱咁樣無成本啦。

即係咁，如果你唔係孖打銀行放咗百幾二百萬定存拎咗金卡嘅朋友，跟我哋最低成本玩法，大概都知要課金畀國泰約三萬銀先可以保金。

大家又棟高床板撫心自問：既然課咗三萬銀畀國泰，你又會唔會搭港航呢？

我哋就簡單簡單啲：港航加國泰，我全部要晒！

基本上係人都玩得：金鵬俱樂部挑戰活動

如果你真係要玩香港航空嘅嘢而要benefit得最多，點解唔揀阿媽海航個金鵬俱樂部呢？其實每一年海航都會有Status Match，今年個官網寫明，只要你有以下其中一樣，就可以參加：

1.其他航空公司正式貴賓會員；
2.各航空聯盟銀卡及以上級別貴賓會員；
3.銀行白金信用卡及以上級別持卡人。

要求1同2當然有啲難度，但要求3呢？對於好多香港人嚟講，有邊個冇白金信用卡？大學啲信用卡張張都白金嚟啦！

只有在申請成功的120天內，飛滿6個海航航段，就可以有張銀卡，而如果想要金卡，就要滿12個海航航段。

咩叫海航航段，我哋會在下一篇度講解。

金鵬俱樂部的權益表中，金卡同銀卡係各有以下比較有用嘅權益：

金卡：貴賓室(自己連同一名親友)、額外30KG行李一件
銀卡：貴賓室(自己)、額外20KG行李一件

佢同維珍唔同嘅地方，就係有貴賓室用。雖然現時港航係玩緊消失的貴賓室，但Plaza Premium都係肉，有咩過唔去都鯁住先啦！

至於點跑、跑咩線最低成本，我哋會在下一篇度同大家細心分析！

國泰Status Match：兩樣都要晒？一定要跑金鵬金卡！

如果你真係想國泰同港航兩樣都要晒，一定要選擇玩金鵬金卡。

其實國泰航空一直都有Status Match，不過因為疫情期間收咗皮。但近排國泰同外媒放緊消息，話Status Match會好快回歸。

國泰嘅Status Match一直都好神秘，冇話你知咩航空公司得，咩公司唔得。

有聽過話聯合航空會唔Match，但國內航空公司一向都接受，但極大情況下，因為航空聯盟會員制度，除咗寰宇一家嘅航空公司有三級制外嘅會兌足外，其他都會直接降一級。

即係如果你跑咗金鵬俱樂部金卡，就會跌落國泰銀卡。如果拎住金鵬俱樂部銀卡，你就乜都冇(有嘅，乜用都冇嘅綠卡囉)。

有人可能會話：國泰Status match？要交過往飛行紀錄喎！所以咪話依家係好時機囉！依家開關半年都冇，你跑海航個Status Match跑咗十二個海航航段，國泰都冇得抽秤你飛得唔frequent啦！

如果國泰唔得？咁我咪收得皮？當然唔會啦！

我哋仲有另一個超前部署！留意下一篇！