航空短打 – 香港航空完美示範 咩叫自製公關災難

4

關公,呀唔係,係公關傳訊呢一行,當然唔似TVB師奶劇《幕後玩家》咁,日日見住K歌之走音王澤囝玩車媾女咁開心,佢地理論上係要守住公司最後一條防線——公司形象呀!香港航空近排就出名啦!事關有高登仔聲稱,香港航空入面有個小職員疑似呃蝦條,仲有埋對話擷圖,有圖有真相今次硬食。係,本身就真係唔關香港航空事嘅,但問題係傳訊部份聲明出晒事囉!

事關香港航空響10月26日出咗份聲明回應,唔出猶自可,出咗就真係嚇一跳,然後得啖笑。點解咁講?不如我哋睇睇內文先:

5

香港航空有關職員疑似涉誤導求職者事件的聲明
日期: 2016-10-26

有關日前有職員疑似涉誤導求職者的事件,本公司已於本週一(十月二十四日)勒令涉事員工立即停職,並於今日(十月二十六日)完成內部調查。調查結果顯示,該涉事員工違反公司對員工操守和職責的相關規定,因此本公司已於今日(十月二十六日)與該員工終止僱傭合約。目前,事件已由警方處理,本公司將密切留意案件進展並全力配合警方調查。本公司就此事件保留採取適當法律行動的權利。

香港航空特此聲明,是次事件為單一事件。作為負責及提供平等就業機會的僱主,本公司的招聘政策是以公開及公平競爭為原則,遴選合乎資格的求職者。無論是否通過員工轉介,所有求職者均須通過既定面試、筆試程序及試用期的各項嚴謹培訓和考核後,方能成為正式員工。公司員工手冊規定,員工須保證正直誠信,堅守其職責及維護公司名譽。本公司對於違反公司內部條例及任何欺詐行為絕不容忍,一旦發現任何員工作出此類行為,將按照相關規定和程序對其作出包括但不限於即時解僱的嚴厲處罰。

首先,我哋都唔想話成篇公關稿完全冇一篇公關稿應有格局喇,單係一個標題「香港航空有關職員疑似涉誤導求職者事件的聲明」,已經又長又累贅又唔通順:咩叫做「疑似涉誤導」?又疑似又涉嫌?咁應該係疑似定涉嫌呢?然後,「誤導求職者事件的聲明」,個「的」字完全係多餘,大公司傳訊部門竟然出現中學生級數中文Common Error,我真係恭喜你呀。

最好笑係,傳訊部竟然犯下公關界最大忌,就係成功利用新聞稿,呀唔止,係單單用標題頭六隻字:「香港航空有關」,利用「搜尋引擎最佳化(SEO)」嘅威力,將「香港航空」完美扣上今次醜聞。我哋用偉大谷歌搜尋「有關香港航空」或「香港航空有關」字眼,即可找到相關醜聞,永續公關災難,無限回帶,回味回甘。他朝港航萬一又出醜聞,記者朋友一上偉大谷歌搵資料,又可以永續今次呃蝦條猛料:「內部管理早存問題」、「食女食出事」、「員工紀律低下早見先兆」…到時我真係恭喜你唔好得罪…西…西方丈呀!

5

應該點做?不如我哋睇吓出事率甚高「因管理不善而從全球最佳航空公司排名榜節節下跌」嘅國泰航空,面對不利新聞會點回應?你發現,原來國泰一遇上不利新聞,就會立即統一龜縮標題六隻字「國泰航空聲明」就算,等搜尋器唔多搵到。但宣傳新聞嘅標題就寫到爆一爆,隻隻字都係keyword,呢啲唔單止係高招,完全係傳訊經驗豐富,訓練有素。

5

港航呀港航,明唔明點處理呀?不如學你姊妹航空公司快運咁,請公關公司幫你負責啦,事關佢地啲稿,出得真係有條理好多。

您可能也會喜歡…