航空短打 – 銀行唔肯借!中資行借盡!阿爺又落閘!海航大危機!

自從阿爺禁走資後,海航水頭緊消息一浪接一浪!繼早前海航押盡股份做信貸擔保借錢消息傳出後,今日(10/1)蘋果日報報導,海航被多間香港及外資銀行檢視財務情況後拒絕作出借貸融資,只餘下中資銀行「搭膊頭」式借款,海航財務情況可謂笈笈可危,隨時有機會危及子公司香港航空!

大家都知,海航最識玩係財技,先借錢再收購然後再抵押再借錢集資。呢件事如果響經濟好銀紙多嘅情況下當然冇事,但萬一資金短缺,資金供應鏈發生問題,無法繳付債務的話,就只會剩下破產下場。

根據海航2016財務年報,單睇負債率,2015年港航已經接近70%,海航集團平均已經超過70%,即係話,一架飛機70%嘅價值都係靠借貸而來。國泰近年因為汰換新機而負債率有所提高,但畢竟國泰以往一直處於45%水平,對財務壓力影響不算大。港航係有錢賺,但你要明白賺錢之外仲有一樣叫還錢。到期時一筆過連本付息還清,依家只不過唔駛還「住」,和當年復興航空好似有錢賺嘅情況一樣。

睇吓穆迪財務信貸評級就知:國泰航空債券係A3(Upper medium grade),海航債券係Baa3(Lower medium grade),再跌一級就係垃圾級。點解上市兩次都失敗而回?海航2015年曾經考慮過賣走香港航空,如果真係一隻生金蛋嘅雞,快運又點解要上市?上市籌21億,買得7架A320咋!

中國經濟開始放緩,人民幣貶值,現在中央仲要落閘防海航走資,海航可以點買資產呢?冇新資產又點抵押借錢集資?人仔貶值令外遊意慾下降,「海航旅遊生態圈」會否風光不再?記住,海航一直都係地方企業,從來都唔係央企。過去唔係,現在唔係,未來都唔係。萬一有咩事,中央唔一定會出手。要救,都係救咗央企先。

下一批港航無抵押債券2019年到期,究竟會點?好睇未來中國經濟走向。

您可能也會喜歡…