航空短打 – 港航末日?負債過百億!爆淡馬錫唔玩內幕!兼爆違約海航債!

其實港航唔多掂呢件事我哋都唔係第一次講,亦都同大家講過港航機票2019好行人止步,之前已經在5月我地獨家爆料Cut Cost潮同蝕錢風波,上兩個星期我哋又率先爆咗一哥鄧竟成跳船後,惹來唔少傳媒爭相報導。近日又爆出港航新總部欠大判條數多個月,爆煲傳聞似乎非空穴來風!今次我地有財務部已離職員工嘅內部獨家消息,指港航內部財政問題嚴重,聲言港航就算過到初一,都唔一定過到十五!

依家港航其實笈笈可危:「基本上管理層跳晒船其實已經聞到味」。現時港航計入2019年1月同3月要兌現的相關債券等債項,在2019-2020年保守估計已佔過百億,以港航現時盈利能力,償還存在難度:「其實之前淡馬錫都睇過條數,一見到呢個負債已經打晒退堂股。」現時港航每年盈利約2億,要還呢條數,就算唔計利息,都要還足50年。

除此之外,港航的資產表中含有約57億的海航債券及其他投資產品:「呢57億如果贖回到今日就唔洗話冇錢,班高層已經唔駛跳船啦!」他續指,港航持有海航的部分債券及投資產品違約機會極大, 不過因財政年度未能反映,總之港航財務情況肯定極不理想。

該員工直指,現時港航絕對係「凶多吉少」:「因為冇人要!如果為咗個牌,點解唔買香港快運?」事實上,市場有傳言指國泰一直有意趁海航爆煲收購香港快運,開拓廉航市場,不過有關消息仍未得到任何一方證實。

您可能也會喜歡…