航空短打 – 流言滿天飛!南航國航爭港航?消息人士:機會不大

港航唔掂,已經係不爭嘅事實,連佢地管理層都認咗,咁呢件事都冇咩值得再講啦!近日海航打手煙仔何旗下兩間報紙放風,話南航同國航爭住買港航喎!我哋啲大佬上廣州搵南航啲領導們收風返黎,講咗句:機會唔大喎!

點解咁講?「其實海航一直都放風話賣,賣嘅都唔只得香港航空一間,首都航空 、天津航空 、西部航空等等全部有得傾,話兩間搶港航,真係一個美麗的誤會。」海航的確有同三大航空公司傾賣香港航空,不過唔見得三大有好大興趣:「南航、東航同國航都已經拎咗大量一二線城市國際線,無需要靠香港搞轉機網絡。」

佢直言,國航收購嘅可能性不大:「國泰同國航係互控關係,國航真係冇咩理由買一間賠錢貨做代替品。」而且,海航同三大航空公司關係不佳已經眾人皆知:「除非領導下命令,否則三大不見得會幫手。他(海航)一直做虧本生意打市場,我們已經唔順眼好耐,點會幫手?」

咁南航呢?自從南航退出天合聯盟後,市場盛傳會加入OneWorld,消息人士都笑指:「如果係真,我哋買港航嘅消息就更加唔成立喇!哈哈哈!」係咪一定唔收購?「冇人知架喎!價錢好好或許有人買嘅。」機會好微?「海航不是央企呀!不是央企,又怎會有央企待遇?」

您可能也會喜歡…