航空短打 – 後勤凋零!前線冇得飛!快運疑又再爆Cut機危機!

因持續short crew關係而準時率大跌嘅香港快運航空,可能有機會又再重演七月瘋狂cut機危機!有內部員工爆料,指管理層之前迫所有前線及基層員工改合約制以逃避遣散責任嘅賤招,終於玩出火!

據了解,自從改合約制後,不少快運後勤員工萌生去意,導致離職潮發生:「雖然依家好多航空公司都賺得少,但始終Operation嘅工都係長請長有,唔做HKE(香港快運)都有唔少選擇。」,誰不知後勤凋零不夠幾個月,立即影響前線。

據知今次safety training多人離職,培訓部門運作癱瘓。由於機師及空中服務員每年都需接受安全培訓課程,現時情況導致快運部分員工因未能如期上堂,不能繼續執行飛行職務,情況亦有惡化跡象:「聽聞管理層仲未請到人,再咁落去一定出事。佢地點夠膽要班crew繼續飛?咁搞實畀CAD(民航處)釘牌都似!」

自從爆煲危機後,快運管理層仍然未痛定思痛。海航集團依家面對發改委同證監會調查而應接不暇,快運又瀕臨再爆煲,咁之後又會點收科?

You may also like...