航空短打 – 前線爆鐘!後勤逃亡!管理混亂!員工力數快運爆煲三宗罪!

近月香港首間廉價航空香港快運屢遭乘客及地勤代理員工投訴,指近期航班不停延誤,更延誤長達十六小時和即日取消部分航班,令已經到機場的乘客非常不滿,更造成衝突。有快運員工同我哋爆料,指今次爆煲係管理層不力,並力數快運三宗罪!

罪行1:前線員工嚴重不足 人人爆鐘
有員工表示,快運一直都有前線員工嚴重不足的問題:「前幾個月開始,好多crew其實已經飛到爆晒鐘,到咗民航處法定上限。個更又編到密一密,可能夜機到港聽朝一早就要show up,咁飛法實多人病、實多人走。」據知淡季時前線員工不足問題已經浮現,但未獲管理層正視。

罪行2:管理層縮數 永久轉合約
除此以外,管理層為求減少開支,將部分後勤基層員工由永久制轉至合約制,意圖逃避遣散責任,導致後勤出現離職潮:「公司賺咁多錢,竟然改晒我哋做合約制!想第時有咩事炒人連遣散費都慳番!」據知Operation部門成為離職重災區,其中包括crew control。

罪行3:管理層傲慢 眾叛親離
快運管理問題其實已經醞釀多月,但管理層依然冇正視過問題,有前線crew透露:「我哋只係想個更表人性啲,有合理時間休息,但佢地永遠覺得『大把人想入黎做,你唔做可以走。』嘅態度處理我哋嘅意見。」後勤情況亦同出一轍:「管理層唔當我哋係人,只係當我哋係替代品,覺得你走咗大把人頂到,依家睇到咪就係頂唔到囉。」

今次快運爆煲事件,令快運平靚正美譽一鋪清袋,管理層一日未痛定思痛,員工士氣繼續低落,情況只會越來越差。

您可能也會喜歡…