航空短打 – 你有你鬧 獎繼續拎 國泰票選奪多項機艙產品大獎 你又點睇?

咩話?國泰服務越來越差?少年你太年輕了!話說國際專門評核航空公司產品嘅媒體The Design Air公佈2016年各大機艙設計獎項,以公開投票形式進行,國泰航空囊括多個獎項。當然,全部都係國泰一直做得好又收費貴嘅商務艙同特選經濟艙產品啦!競爭激烈又唔多賺錢嘅經濟艙?哈哈哈哈哈…但係咁,究竟國泰係咪實至名歸先?等我哋編輯部評一評先!

1.全球最佳商務貴賓室 – 玉衡堂

我哋都有做過達人報告嘅玉衡堂,2016年7月翻新開幕,係國泰航空旗艦商務貴賓室,亦都係全亞洲最大商務貴賓室。老實講,小編都搭過唔少商務艙,呢個貴賓室真係又大又多嘢玩多美食選擇之餘,好多檯旁都有USB叉電器,完全係超貼心嘅設計,真心講,一流!

狂徒編輯部實至名歸指數:★★★★★ (5/5)

2.全球最佳品牌 – 國泰航空

老實講,國泰上年開始進行品牌簡化策略,無論係貴賓室設計、網站到PTV系統介面都作出好多簡化措施。係唔係最好的確見人見智,但的確食到近年簡約風呢條設計路線。

狂徒編輯部實至名歸指數:★★★★☆(4/5)

3.最佳特選經濟艙 – 國泰航空

吓?原因係咩?原因係A350產品有Gadget位同埋手柄位更符合人體工學設計舒服好多喎!不過呢,咁嘅價錢,服務同經濟艙冇咩分別,畀多少少額外服務都唔係錯丫…

狂徒編輯部實至名歸指數:★★★☆☆(3/5)

總結:

老實講,國泰嘅商務艙一向出色是常識來的吧!服務都依家都Keep到高水平,所以有獎絕不意外!不過呢,經濟艙雞肋嘅嘢就算吧啦…

資料來源:The Design Air

您可能也會喜歡…