航空短打 – 世界末日?要買就快?平飛不再?燃油附加費貼士話你知!

民航處2018年9月21日宣佈放寬對航空公司燃油附加費(YQ)的規管,坊間好多旅遊網都話加價在即,叫大家要買飛就快!咁作為求真冇吹水嘅我哋,梗係問齊兩間航空公司(國泰同港航)嘅相關消息人士問清楚啦!佢地異口同聲都話:吓?加價?你估真係咁易?

兩位相關人士同我哋講,香港個市場競爭其實好激烈:「廣州、澳門、深圳全部同香港堆客一齊打,你哋報咁多深圳盤都平過香港啦,廣州幾百蚊飛LH(德航)去歐洲,趁住YQ(燃油附加費)加價同自殺冇咩太大分別。」咁即係點?「票價燃油嗰部分拉出黎收YQ,你會見淨票價會平咗但雜費會貴咗,dup勻番個數唔會有大變動囉!」係咪唔會加價?「加都按油價嚟加,或者競爭小咗嚟加,競爭大嘅都照劈架啦!」

咁即係今次YQ係虛火?又唔係喎!「如果你儲開Miles咪要畀多幾百甚至成千囉!以前條數放入票價入面,依家拉出嚟當雜費收,redeem ticket嗰班咪要硬食囉!」咁如果你係里數持重貨,睇怕都要減減磅喇!

您可能也會喜歡…