[會籍操作]如何唔洗三萬蚊港紙落樓保金:國泰航空Marco Polo Club跑分路線精選

是咁的,我哋唔係標題黨,昆你玩英航同埋日航呀!係國泰航空Marco Polo Club,OK?

既然你要嚟保金,即係代表你已經踏上咗國泰航空Marco Polo Club跑分呢條不歸路,咁咩嘢係Marco Polo Club、個會籍點玩呀、點樣先保到級呢啲乜乜柒柒我哋就唔多講喇。

直接啲講:你都係想要600個會籍積分咋嘛。跟據正確途徑(即係不停地搭國泰航空),以經濟艙最Cheap嗰款Booking Class嚟計,你一年飛12次來回倫敦,或者60次來回台北,你就可以有張金卡喇!一年飛12次倫敦仲要得經濟艙,真係不了。

時間對你嚟講可能唔係問題,但錢呢?咁樣飛法,你保金需要嘅資金係:

倫敦機票連稅港幣$5900 x 12張=港幣$70800
台北機票連稅港幣$1700 x 60張=港幣$102000

重要的事講三次:唔洗三萬蚊港紙落樓保金!唔洗三萬蚊港紙落樓保金!唔洗三萬蚊港紙落樓保金!

重點:全部都係商務艙。12次倫敦econ?你自己慢慢飛啦!

識玩一定玩隔山打牛:馬來西亞航空

如果你想用最快方法拎會籍積分,最好用嘅方法係搭馬來西亞航空商務艙:HKG/KUL/BKK,來回一次就有100積分,來回6次就金卡已保。

咁樣飛法,你保金需要嘅資金係:

機票連稅港幣$5800 x 6張=港幣$34800

不過一年要等兩次嘅Year Sale,先可以以連稅價$5800嘅價錢入貨。如果唔係減價,你就要用連稅$8000價位入貨,呢個價位我哋都不了啦。

如果我唔想等呢?不妨玩吓呢張:

馬來西亞航空商務艙:TPE/KUL/BKK

同樣地,來回一次就有100積分,來回6次就金卡已保。

有咩咁特別?呢張嘢好玩在於連稅價Year Sale都連稅只係台幣$16369(約港幣$4235)左右,但同樣地都有100積分,搭四程商務艙喎,呢口價係好抵屌嘅~

咁樣飛法,你保金需要嘅資金係:

機票連稅港幣$4235 x 6張=港幣$25410

唔洗三萬銀,金卡已保。

咁係咪一定要Year Sale先買到呢?嗱馬航對台北嘅人好好,就算平日唔係減價嘅時候,連稅都係港幣$5300左右。即係就算平日,你都係用三萬多少少嘅價錢保級。

不過呢個盤有樣嘢唔太好,就係回程要overnight吉隆坡一晚要瞓一晚機場。Book酒店?Come On!你係搭緊商務艙呀朋友!你瞓都可以瞓佢哋馬航最大嘅Lounge:International Golden Lounge at Satellite KLIA ,24小時營業,酒店都慳番。

運用你的OneWorld夥伴航空公司行李直掛服務

你會問:呢個盤要補多張來回台北機票喎,咁係咪要出境拎行李再入境寄艙啊?

你呢條問題非常好呀!嗱,理論上兩張都唔係聯程機票,所以理論上係要響台北出境再入境,理論上。

不過呢,國泰同馬航都有同佢哋嘅OneWorld夥伴航空公司非聯程機票無縫寄艙行李直掛服務,即係話,你可以直接響台北轉機區轉機去曼谷/返香港,連海關都唔洗過。

但記住,一定要響香港/曼谷頭程向地勤要求行李直掛,一定要。

如果香港國泰地勤say no,你可以畀呢個網址佢睇,同埋畀埋你馬航嘅PNR佢處理。到達桃園機場時記得去轉機櫃檯A區(中華航空),拎下程登機證。

如果曼谷馬航地勤say no,你可以畀呢個網址佢睇,同埋畀埋你國泰嘅PNR佢處理。到達桃園機場時記得去轉機櫃檯B區(國泰航空),拎下程登機證。

點解要咁做呢?因為來回程嘅起始航空公司唔同,例如國泰可以直掛到其他OneWorld成員非聯程航班上,但澳航就唔提供同樣直掛服務。同樣地,好多時外站地勤唔一定知有呢個Policy,所以要畀清楚資料據理力爭,不過都建議你預備定台灣簽證以保安全。

咁如果我搭中華/長榮/港航呢?嗱!港航同馬航冇咩交集唔好諗咁多喇,長榮應該都冇,中華同馬航有interline agreement理論上係可以嘅(已Fact Check:香港唔會做,回程keep住得),最好打上客戶服務問問先。

仲有咩嘢要問?冇就可以開始跑啦!

好啦,幾時有Year Sale?Sorry啱啱香港同台北都完咗(好似係)。

__你!自己上馬航官網check啦!自己跑金點解都要咁懶呀?

台北機票要畀錢買?申請美國運通國泰航空信用卡,賺里數換台北機票玩行李直掛咪開心仔囉!

您可能也會喜歡…